Бүгүн о.э. тохсунньу 23 күнүгэр, Чурапчы нэһилиэгэр 6 улахан тиэхэньикэлээх 40-тан тахса киһилээх байыаннай састаап — “Арктика” эспэдииссийэтэ тохтоон аастылар.
Соҕуруу дойдуттан ыраах Өймөкөөн улууһугар айаннаан иһэр холуонна Чурапчы сиригэр-уотугар бэҕэһээ киэһэ 22 чаас 30 мүнүүтэ ааһыыта айаннаан киирбиттэрэ, онтон бүгүн Чурапчыга ыытыллар дьаһалларга кыттыыны ыллылар, Омскай куораттан хаһан даҕаны сөҕүрүйбэт уоту аҕаланнар биллибэт саллаат уҥуоҕар уурдулар, буойуттар сырдык кэриэстэригэр анаан венок, сибэкки дьөрбөтүн уурдулар, эспэдииссийэ сорох чааһа оскуола үөрэнээччлиэрин кытары көрсөн кэпсэттилэр.
Байыаннайдары бэйэлэрин көрсөн кэпсэппиппитигэр, сабыс-саҥа собуоттан тахсыбыт үс тиэхэньикэни уустук суоллаах-иистээх итиэннэ тыйыс тымныы дойдуга чинчийэн үөрэтэн көрөөрү айаннаан иһэллэр эбит. Ону таһынан бу тиэхэньикэлэр үөрүйэхтэрин этэҥҥэ аастахтарына инникитин нэһилиэнньэ олоҕор-дьаһаҕар көдьүүстээх буолуоҕа диэн кэпсээтилэр. Онон Чурапчы улууһун олохтоохторун “бу байыаннайдар атын туох эрэ сыаллаах-соруктаах айаннаан иһэллэр быһыылаах” диэн долгуйбаттарыгар ыҥырдылар.
Манна даҕатан эттэххэ бу эспэдииссийэ аара өссө Ытык Күөлгэ, Хандыга бөһүөлэктэригэр тохтоон ааһыаҕа.
Сэмэн Жендринскэй. Ааптар хаартыскаҕа түһэриитэ