Төрөөбүт тылга болҕомто ууруу билиҥҥи кэмҥэ тирээн турар биир тыын боппуруос буолар. Улуустааҕы Дьахтар сэбиэтэ, киин библиотека «Норуот инники кэскилэ — тылыгар» («В сохранении языка- будущее народа») бырайыага 2023 сыллаахха Дойду Президенин култуураны көҕүлээһинин пуондатын гранын ылбыта.Бырайыак ааптара — улуустааҕы киин библиотека үлэһитэ Римма Петрова, үлэлэстэ — сүрүннүүр библиотекарь Матрена Захарова.
Быйыл нуучча улуу суруйааччыта А.С.Пушкин төрөөбүтэ 225, бэйиэт, Аҕа дойду Улуу сэриитин кыттыылааҕа, ССРС Суруйааччыларын сойууһун чилиэнэ Г.И.Макаров-Дьуон Дьаҥылы төрөөбүтэ 110 бэлиэ сыллара.
Бырайыак иитинэн Дьуон Дьаҥылы А.С.Пушкин «Евгений Онегин» хоһоонунан суруллубут романын тылбааһын эдэр ыччакка, араас идэҕэ үөрэнэ сылдьар Чурапчытааҕы аграрнай- техническэй колледж устудьуоннарыгар билиһиннэрдилэр, аахтардылар.
Конкурстар, ааҕыы култууратыгар маастар-кылаастар ыытылыннылар. Устудьуоннар араас таһымнаах тэрээһиннэргэ көхтөөхтүк кыттан, саҥаны билэн-көрөн, бэйэлэрин атын өттүттэн дьоҕурдарын арыннылар.
Колледж баһаарынай, теплоснабжение, электроснабжение, ветеринария салааларын устудьуоннара Слава Прокопьев (Мэҥэ Хаҥалас), Диана Винокурова (Горнай), Стас Барбасытов (Таатта), Степан Наумов (Чурапчы), Рита Рахматуллина (Чурапчы), Павел Егоров (Чурапчы), Сергей Порядин (Таатта) талыллан, эбии дьарыктанан, Дьуон Дьаҥылы тылбааһын И.И.Кандинскай аатынан «Айыллаан» сынньалаҥ киинин специалиһыгар Андрей Илларионовка ааҕан уһулуннулар.
Колледж педагог-библиотекара Розалия Степановна Пономарева сүрүннээн, ааҕан төһүү күүс буолла.
Бу курдук эдэр ыччат хабыллан, төрөөбүт төрүт тылларынан саҥаран, бэйэлэрин сэмэй кылааттарын киллэрдилэр.
Е.А. Борисов аатынан улуустааҕы киин бибилэтиэкэ
Аудио кинигэни сигэнэн киирэн истиҥ, сэргээҥ