Аҕа дойдуну көмүскүүр Улуу сэриигэ Соловьев нэһилиэгиттэн 90-ча киһи барбыта. Кинилэртэн аҥардарын кэриҥэ кыргыс толоонугар сырдык тыыннарын толук уурбуттара.
Өлбүт буойуннар истэригэр Аҕа дойдуну көмүскүүр сэрии 2-с истиэпэнэ уонна Кыһыл Сулус уордьаннар кавалердара, старшай лейтенант Д.М. Сергеев, капитан З.И. Федоров, лейтенаннар П.С. Соловьев, И.Н. Федоров, сержант М.Т. Собакин, ефрейтор П.Е. Попов уонна да атыттар бааллар. Ити курдук хайыһардьыттар В.К. Федоров, С.Д. Петров Ленинградскай, байыастар Д.В. Кривошапкин Орловскай, П.К. Федоров, П.А. Собакин Смоленскай уобаластарга охсуһа сылдьан охтубуттара.
Кыргыс толоонуттан тыыннаах эргиллибиттэри аҕыннахха, Казаннааҕы медицинскэй үнүстүүтү бүтэрбит Д.Т. Брыскаев байыаннай бырааһынан Смоленскай уобаласка тиийэн сэриигэ сүрэхтэммитэ. Курскай Орловскай тоҕойунан кыырктаах кыргыһыыларга киирсибитэ. Днепри туораан Киеви ылыыга бааһырбыта уонна бэйэтин чааһын Житомирга сиппитэ. Дрогобыч, Борислав куораттары бохсолооһун иһин түөһүгэр Кыһыл Сулус уордьан анньыллыбыта. 1944 сыл күһүн фашистскай талабырдьыттары Карпатскай Украинаттан үүрсэн Ужгородка тиийбитэ. Медицинскэй сулууспа майора Дмитрий Титович Брыскаев Венгрияны, Польшаны, Чехословакияны босхолооһуҥҥа хорсуннук кыттыбыта уонна Аҕа дойдуну көмүскүүр сэрии 2-с истиэпэн уордьанынан наҕараадаламмыта.
В.П. Попов Чурапчытааҕы педучилищеҕа үөрэнэ сылдьан 1942 сыллаахха аармыйаҕа барбыта. Сэриигэ Донской уобаласка киирбитэ. Ворошиловграды босхолооһуҥҥа бааһырбыта. Онтон Курган куоракка үөрэнэ Т-34 танк радиһа уонна пулеметчига буолбута. Арҕаа фроҥҥа Лебединск куораты босхолооһуҥҥа иккиһин бааһырбыта. Итинтэн танковай училищены бүтэрэн СУ-100 артиллерийскай установка хамандыырынан өстөөх арҕаҕар Берлиҥҥэ тиийэ инники кирбиигэ сылдьыбыта. Берлини ылыыга Ландвер каналы туоруур муостаҕа бастакынан сүүрдэн киирбитэ. Бэйэтин экипаһынан биир пулеметнай туочуканы, 20 снайпер бөҕөргөтүнүүтүн суох оҥорон, биһиги танковай холуоннабытыгар суолу аспыта. Ити иһинр В.П. Попов Аҕа дойдуну көмүскүүр сэрии 2-с истиэпэнэ уордьанынан наҕараадаламмыта.
Хомуньуус, рота партийнай тэрилтэтин сэкирэтээрэ Н.Н. Хомподоев Москуба анныгар хорсуннук сэриилэспитэ. Кыһыл Сулус уордьан кавалера. П.С. Соловьев, Д.А. Сергеев, Н.А. Сергеев эмиэ бойобуой уордьаннаах эргиллибиттэрэ.
Немецкэй фашистары утары сэриигэ нэһилиэктэн 20 хомсомуол эдэркээн олохторун биэрбиттэрэ, дойдуларын буоругар 10 хомсомуол үктэммиттэрэ.
Сэрии уотуттан ордубут фронтовиктар үлэ фронугар эмиэ бэйэни харыстаммакка туруммуттара. Кэлин сопхуос зоотехнигынан үлэлээбит Д.С. Соловьев, тырахтарыыс М.Г. Николаев, сылгыһыт Н.А. Федоров уо.д.а. айымньылаах үлэ-хамнас үөһүгэр сылдьыбыттара.
Нэһилиэк дьоно хорсун фронтовиктарын бойобуой суолларынан киэн тутталлар.
Сэмэн ЖЕНДРИНСКЭЙ