Константин Константинович Федоров толорбут үлэтэ арсыынынан да кэмнэммэтэҕин, ыйааһыҥҥа да ууруллубатаҕын, дьон-сэргэ хараҕар тута барҕыллан испэтэҕин да иһин түбүктээх уонна эппиэттээх этэ. Кини промкомбинакка старшай хачыгаарынан үлэлээбитэ.
Бу – олох киэҥ аартыгар бэйэтин олугун ууран уһун ыллыгы тэлбит киһи. Константин Константинович тугу-тугу үлэлээбэтэҕэ этэй! Ол тухары чиэһинэйинэн, толоругаһынан, үлэ ыарахаттарыттан иҥнэн-толлон турбатынан салалта, дьон-сэргэ махталын мэлдьи ылара.
Кыһыҥҥы аам-даам тымныыларга кэлэктиибин дьоно итии дьиэҕэ кыһалҕата суох үлэлиирин туһугар туох баар кыһамньытын уурара. Ити кэм устатын тухары болҕомтолоох үлэһит хочуолунайын мэлдьи үчүгэйдик көрөр-истэр буолан хааппыла уу тэстэн, биир батарыайа тоҥон сүпсүгүрүүнү таһаарбыта суоҕа. Ол да иһин кыһынын ити үлүгэрдээх улахан уораҕайдар сайыҥҥылыы итиинэн илгиһэллэрэ. Сүрүн үлэтин таһынан настаабынньык быһыытынан эдэрдэри үлэ мындырдарыгар такайара.
Промкомбинат салалтата бу сэмэй оробуочайы биир баттаамалаах тутаах үлэһитинэн сыаналыыра. Ону барытын ити уонтан тахса сыл устата биирдэ да буруйданан-сэмэлэнэн көрбөтөҕө даҕаны туоһулууллар. Промкомбинат тэриллибитэ 40 сылын туолуутугар кэлэктиип атын бастыҥ үлэһиттэрин сэргэ Константин Федоров Саха АССР Олохтоох бырамыысалыннаһын министиэристибэтин Бочуотунай грамотатынан наҕараадаламмыта.
Уон оҕо тапталлаах аҕата, иллээх дьиэ кэргэн баһылыга Константин Константинович ыччаттара улаханыттан кыратыгар тиийэ бары үлэһит бэртэрэ, төрөппүттэрин “туйаҕын хатарар” удьуор бүгүрү дьон. Дьоруой Ийэ Варвара Саввична оҕолоро үөрэх, үлэ үөрүүтүн билэн олоххо бэйэлэрин миэстэлэрин булуналларыгар үгүс сыратын-сылбатын биэрбитэ. Саамай улахан уоллара суоппардаабыта.
Үлэһит дьиэ кэргэн оҕолоро дьоннорун “туйаҕын хатаран” ханнык баҕарар үлэҕэ сыстаҕастар, аҕа табаарыстары ытыктыыр, дьоҥҥо эйэҕэс буола улааппыттара.
Итинник ыаллар Федоровтар!
Сэмэн Жендринскэй