Саҥа дьиэ “Култуура” национальнай бырайыак чэрчитинэн тутулунна. Дьиэни Владимир Цыпандин салайааччылаах “Стройкомплект” ХЭТ тутан киллэрдэ. Икки этээстээх дьиэ уопсайа 1030,2 кв.м иэннээх, 121 көрөөччү олорор миэстэлээх киэҥ саалалаах, миэбэлинэн уонна оборудованиенан хааччыллыбыт.
Бэлиэ түгэҥҥэ СӨ Бырабыыталыстыбатын бэрэссэдээтэлин солбуйааччы Сергей Местников, РФ сенатора Егор Борисов кэргэнинээн Прасковья Петровналыын, Култуура миниистирэ Афанасий Ноев, улуус баһылыга Степан Саргыдаев, дьокутааттар Сэбиэттэрин бэрэссэдээтэлэ Яков Оконешников, о.д.а. эҕэрдэ тылларын эттилэр, наҕараадалары туттардылар.
Алгыс сиэрин-туомун Бахсыттан төрүттээх СӨ норуодунай артыыһа Герасим Васильев, СӨ үтүөлээх артыыһа Александр Дьячковскай – Ырыа Саарын ыыттылар. Аалай кыһыл лиэнтэни Сергей Местников, Степан Саргыдаев, Иннокентий Барашков уонна саҥа дьиэ салайааччыта Людмила Местникова быстылар.
“Саҥа эбийиэк тутуллуон иннинэ хас да сиринэн көһө сылдьан үлэлээбиппит. Ол курдук, 1995с. бүтүүлэригэр урукку, оһоҕунан оттуллар балыыһа дьиэтигэр, 1997с. Томтортон көһөрүллэн аҕалыллыбыт маҕаһыын дьиэтигэр, салгыы култуурунай-спортивнай киининэн, “Маарыкчаан” ПО дьиэтинэн төттөрү-таары көһө сылдьыбыттара. Онон бүгүҥҥүттэн үлэлииргэ-хамсыырга, сайдарга саҥа саҕахтар, кыахтар арылыннылар. Олохтоохтор үөрүүбүт уонна махталбыт муҥура суох”, — диэн нэһилиэк баһылыга Иннокентий Барашков санаатын үллэстэр.
Санатан эттэххэ, Бахсыттан ырыаһыт Александр Дьячковскай- Ырыа Саарын, медиа эйгэҕэ киэҥник биллэр Анна Егорова-Николь, Оҕо искусство оскуолатын скрипкаҕа преподавателэ Анастасия Слепцова, о.д.а. курдук ааттаах-суоллаах айар дьон тахсыбыттара.
Бахсыга билигин хас даҕаны айар түмсүү үлэлиир. Любовь Барашкова салайааччылаах “Эрэл”, “Саһарҕа” үҥкүү бөлөхтөрө, Надежда Барашкова салайааччылаах “Күөрэгэй” ырыа ансаамбыла, “Далбарайдар” фольклор бөлөҕө, Иннокентий Барашков салайааччылаах “Туйма” ВИА, Татьяна Ноговицына салайааччылаах “Уран тарбах” иистэнньэҥнэр түмсүүлэрэ, Туяра Слепцова салайааччылаах музей.
Елена Макаринская
Наталья Сибирякова видеоҕа устуута