Хас сылын ахсын, Саҥа Дьылы көрсө, А.П.Гоголев аатынан Чурапчытааҕы оҕо искусствотын оскуолата, оҕолорго уруһуйунан открытка куонкуруһун тэрийэн ыытар. Эҕэрдэ открыткалары оҕолор ис сүрэхтэрин арыйан, үтүө санааларын баҕаран, ойуулаан-бичиктээн саха саллааттарыгар хатыламмат истиҥ сыһыан эйгэтин үөскэтэр гына оҥорбуттар.
Саҥа дьыллааҕы открытка хас туппут саллааппытыгар күүтүүлээх үөрүү, өрөгөй, оҕо саас дьикти түгэннэрин санатар бэлэх буолла дии саныыбыт. Барыбытын көмүскүү сылдьар буойуттарбытыгар анаан илиилэрин сылааһынан ойуулаабыт, истиҥ сыһыаннарын тиэрдибит баҕа санаалаах Оҕо бэлэҕэ өссө күндү буоллаҕа.
Бу сыллааҕы «Новогодний привет солдату!» диэн открытка куонкуруһа быстах байыаннай дьайыыга сылдьар буойуттарбытыгар Саҥа дьыл бырааһынньыгар тириэрдиллэр гына толкуйдаммыта. Куонкуруска 40 оҕо кытынна. «Эн биһиэхэ хас биирдиибитигэр ДЬОРУОЙгун!», «Дойдугар кыайыылаах төннүн!», «Дьиэ кэргэҥҥинээн бииргэ буоларгар баҕарабын!», «Биһиги эйигинэн киэн туттабыт!» курдук тыллардаах открыткалар айаннаабыттара. Оҕолор үлэлэрин сыаналаатылар: биир дойдулаахпыт Россия художниктарын Сойууһун чилиэнэ, СӨ народнай худуоһунньуга, СӨ культуратын үтүөлээх улэһитэ Александра Самсоновна Иннокентьева-Бочкарева-Сууралдьыма, Россия художниктарын Сойууһун чилиэнэ, СӨ культуратын туйгуна Надежда Егоровна Федулова, Россия художниктарын Сойууһун чилиэнэ эдэр худуоһунньук Нюргуяна Александровна Амыдаева. Оҕолор «суруктара кытары минньигэс» диэн тыллар истэргэ олус үчүгэй.
Ахсынньы 18 күнүгэр, открыткалары Дьокуускай куоракка, Аҕа Дойдуну көмүскээччилэр дьиэ-кэргэттэрин кэмитиэтин салайааччытыгар Светлана Диодорова-Лаврентьеваҕа туттараары тиийдим. Ол киирэн көрдөхпүнэ, кини кабинетыгар рамкаҕа оҕо уруһуйа ыйанан турар эбит. Светлана Владимировна төрөппүт оҕото Владимир быстах байыаннай дьайыыга сылдьар кэмигэр оҕолор ыыппыт открыткаларын туппуттарын, онтон биирэ киниэхэ тиксибитин түөһүгэр бук тутан окуопа буоллун, киирсии буоллун мэлдьи укта сылдьыбытын кэпсээтэ.
Бүгүн, ахсынньы 31 күнүгэр, Светлана Владимировнаттан госпитальга сытар саха буойуттара оҕолор баҕа санаалаах уруһуйдарын тутан олорор хаартыскалара, видеолара кэллэ. Хорсун-хоодуот саллааттарбыт бириэмэтигэр туппуттар диэн олуһун үөрдүбүт. Баҕа санаалаах открыткалар кинилэргэ дьиэлэригэр-уоттарыгар, этэҥҥэ кэлэллэригэр күүс-көмө буолуо диэн эрэнэбит.
Баҕарабыт бары кыттааччыларга, салайааччыларга кэрэни үксэтэ-тарҕата тураргытыгар, айымньылаах үлэҕитигэр ситиһиилэри!
Катерина Захарова, А.П.Гоголев Чурапчытааҕы оҕо искусство оскуолатын живопись кылааһын преподавателэ.
