Бу сайыҥҥыттан саҕалаан “Чурапчы-Аллараа Бэстээх-Чурапчы” хайысханан сылдьар автобуспут (таксистар тылларыгар “Красный Дракон”), Өлүөнэ эбэни туоруур Даркылаах кыһыҥҥы суола арыллан, сарсыҥҥаттан саҕалаан Чурапчы нэһилиэгиттэн Дьокуускай куорат автовокзалыгар тиийиэҕэ.
Улуус олохтоохторо: “Автобуспут сылдьан улаханнык абыранныбыт, киһи куттаммакка эрэллээхтик айанныыр,” – дэһэллэр. Билигин сыана ханна баҕарар үрдүү турар кэмигэр, кыһалҕалаах дьон удамыр сыанаҕа куоракка киирэн тахсаллара саамай тоҕоостоох кэмэ.
Автобус күн-сарсын сарсыарда 8 чаастан Чурапчы нэһилиэгиттэн айанныаҕа, Мугудайы, Нуораҕананы, Төҥүлүнү, Тумулу, Аллараа Бэстээҕи таарыйан Дьокуускай куорат массыынаны көһүтэр саалатыгар 11 чаас 50 мүнүүтэҕэ тиийэрэ былааннанар. Ол онтон 12 чаас 30 Дьокуускайтан хоҥнон Чурапчы нэһилиэгэр 16 чаас 20 мүнүүтэҕэ төттөрү айаннаан кэлиэҕэ уонна киэһэ 17 чааска дьон хомунан дьоллоох Дьокуускай куоракка айаннаан 20 чаас 50 мүнүүтэҕэ тиийиэҕэ.
Олохтоох дьаһалта иһитиннэрбитинэн, билиэт сыаната 451 солкуобай буолуоҕа.
Сэмэн Жендринскэй