Арыылаах нэһилиэгин Бочуоттаах олохтооҕо, II-с Чечня хампаанньатын кыттыылааҕа Иннокентий Барашков, Дойду баһылыга Владимир Путин илии баттааһыннаах Судаарыстыбаннай наҕараадаларын бу соторутааҕыта инники кирбии толоонугар тутта. Бу туһунан, Иннокентий олоҕун аргыһа Сахалена Барашкова иһитиннэрдэ.
Кеша, эрдэ Чечня өрөспүүбүлүкэтигэр наводчик-операторынан сулууспалаабыт эбит буоллаҕына, анал байыаннай дьайыы саҕаламмытын кэнниттэн 2022 сыл от ыйын 1 күнүгэр, бэйэтин баҕатынан дойдутун чиэһин көмүскүүргэ быһаарынан айаннаабыта. Билигин 38-с биригээдэҕэ пехотинец быһыытынан сулууспалыыр. Хорсун саллаат үтүө быһыылара, сулууспалыы сылдьар уолаттарга бастыҥ холобур буоларын туоһулуур махтал суруктар биһиги эрэдээксийэбитигэр кэлитэлээбиттэрэ. Кеша билигин даҕаны инники кирбииттэн тахсыбакка сылдьар, “Эр санаа” уордьаны уонна “Сэриигэ ураты көрдөрүүтүн иһин” мэтээли өстөөҕү кытта киирсиигэ, бэйэтэ төһө даҕаны бааһырдар, уот-ардах быыһыгар хаалбыт икки бойобуой доҕотторун өрүһүйбүтүн иһин иҥэрбиттэрэ. Ол наҕараадата өр да өр айаннаан дьиҥнээх Дьоруойун, дьэ булла.
“Хас сырыы ахсын, биһиги байыаннай сулууспалаах Чурапчыбыт уолаттарын туһунан иһиттэхпитинэ киэн туттар санаа киирэр. Биһиги алааспыт хорсун буойуттарынан, биһиги Сахабыт сиринэн, Чурапчыбыт улууһунан киэн туттуу.
Бүгүн наҕараада бэйэтин дьоруойун булла. Утарсааччыны кытта тэҥэ суох киирсиигэ хорсун быһыытын, санаатын иһин Арыылаах нэһилиэгиттэн төрүттээх Кешабыт “Эр санаа” уордьанын уонна “Сэриигэ ураты көрдөрүүтүн иһин” мэтээли иилинэр чиэскэ тигистэ! Кини – биһиги улууспут дьиҥнээх Патриота, дойдубут кэскиллээх олоҕун туһугар хорсуннук уонна эр санаалаахтык киирсэр биир бастыҥ саллааппыт.
Кешаны өссө төгүл наҕараадатынан ис сүрэхпиттэн эҕэрдэлиибин! Чурапчы улууһа бүттүүн киэн туттар!” – диэн Чурапчы улууһун бойобуой дьайыы бэтэрээннэрин Сэбиэтин бэрэссэдээтэлэ Илья Сергеевич Березкин санаатын үллэһиннэ.
Кеша курдук хорсун буойуттар, инникитин сулууспалыы барар уолаттарга, ыччаты патриотическай тыыҥҥа иитиигэ үтүө холобур буолаллар. Бойобуой доҕорбутун, наҕараадатынан өссө төгүл эҕэрдэлиибит, кыайыы-хотуу көтөллөөх түргэнник дойдугар, дьиэ кэргэҥҥэр, оҕолоругар, ийэтигэр кэлиэн баҕарабыт.
Сэмэн Жендринскэй