Ох саа түҥ былыргы сахалар биир саамай суолталаах уонна уустук оҥоһуулаах сэриигэ уонна булка-алка туттар тыын суолталаах тэриллэрэ буолар. Ох саанан уһулуччу бэргэнник ытааччылар уонна сымсатык оноҕостон аһарааччылар тустарынан үһүйээннэр күн бүгүҥҥэ диэри уос номоҕуттан түспэттэр.
Бу успуорт солун көрүҥүнэн Алаҕар нэһилиэгин олохтоохторо быйылгыттан дьарыктанан эрэллэр. Олортон күүскэ ылсан туран Г. Д. Протодьяконов аатынан Алаҕар орто оскуолатын 9-с кылааһын үөрэнээччитэ Лилияна Баишева дьарыктанар:
— Ох саанан былырыыҥҥыттан дьарыктанабын. Тренерим — Барыс Баишев. Былырыын балаҕан ыйыттан СӨ первенствотыттан саҕалаан «Байанай бэлэҕэ», «Өрөспүүбүлүкэ чорооно», о. д. а. күрэхтэргэ ситиһиилээхтик кытынным.
Саха ох саатынан саҥардыы дьарыктанан эрэр диэтэххэ, Лилияна кэккэ ситиһиилэрэ элбээтэ. Ол курдук, алтынньы 14-15 күннэригэр Нам улууһугар В.И. Ленин аатынан колхуос бэрэсэдээтэлэ, Аҕа дойду улуу сэриитин кыттыылааҕа Николай Москвитин аатынан саха ох саатынан ытыы өрөспүүбүлүкэтээҕи турнира буолан ааста.
Күрэххэ уопсайа 161 киһи кыттыыны ылбыт. Олортон — 17 уол, 22 кыыс оҕо.
Лилияна бу турниртан үс мэтээли аҕалла. Кыргыттар икки ардыларыгар тииҥи ытыыга 2-с миэстэ, куһу ытыыга 3-с миэстэ уонна үс күрэх (куобах, кус, тииҥ) түмүгүнэн 2-с миэстэ буолары ситистэ.
Лилиянаҕа инникитин да ситиһиилэри баҕарабыт.
Алик Копырин, 11 кылаас, Г. Д. Протодьяконов аатынан орто оскуола, «Алаҕар кэскилэ» медиа киин