Мусуой күнүн чэрчитинэн Гавриил Протодьяконов аатынан Алаҕар орто оскуолатын кыраайы үөрэтэр мусуой-хоһо, чуолаан оскуола дириэктэрэ Валентина Максимова көҕүлээhининэн “Өбүгэ ситимэ” бырайыак көдьүүстээхтик үлэлиир.
“Бырайыакпыт сүрүн сыалынан Дойдуга “Дьиэ кэргэн сылыгар” нэһилиэк ыаллара өбүгэлэригэр анаабыт быыстапкаларын (муннуктарын) көрүү буолла. Бырайыак ис хоһоонугар удьуору утумнаан хас биирдии киһи, ыал ис култууратын көрдөрөр малын-салын көрүү тэрилиннэ. Хас биирдии дьиэ кэргэҥҥэ сылы-дьылы уҥуордаан өбүгэлэриттэн хаалбыт малы-салы уурар муннугу (дьоҕус түмэли) тэрийэ сатаатыбыт. Бу маллары тирэх оҥостон ыаллар бэйэлэрэ, аймах устуойатын үөрэтэллэригэр тирэх буолара саарбахтаммат. Аҕа көлүөнэҕэ убаастабылтан саҕалаан оҕолор сиргэ-уокка, төрөөбүт дойдуларыгар тапталлара саҕаланар.
Бырайыакпытыгар барыта холбоон нэһилиэкпит 19 дьиэ кэргэн. көхтөөх кыттыыны ылла. Устубут матырыйаалларбытын салгыы биэрии быһыытынан таһааран иһиэхпит. Бары кыттыыны ылбыт ыалларга оскуолабыт кэлэктиибин аатыттан дириҥник махтанабыт”, — диэн оскуола дириэктэрэ, бырайыагы көҕүлээччи Валентина Гаврильевна кэпсээтэ.
Сэмэн Жендринскэй