Куонкуруска Чурапчы улууһуттан 11 сайабылыанньа бэриллибититтэн сүүмэрдээһини 10 кыттааччы ааһан, куонкуруска кыттар көҥүлү ылыылара — биир туспа ситиһии. Үрдүк бааллары ылан, кыайыылаах аатын сүкпүт Айсен Толстоухов уонна Петр Максимов сылгыны иитиигэ, Василий Дьячковскай кустары, хаастары, индюктары, бройлердары иитиигэ, Константин Кривошапкин сүөһүнү иитиигэ граны ылан, хаһаайыстыбаларын салгыы сайыннарар кыахтаннылар. Тыа хаһаайыстыбатынан олорор, сайдар улуус дьонугар бу үчүгэй өйөбүл.
Санатан эттэххэ, 2023 сылга “Агростартап” граныгар 92,2 мөл солк көрүллүбүтэ, ол иһигэр 33,3 мөлүйүөнэ федеральнай бүддьүөттэн. Бу грант саҥа саҕалааччы фермердэргэ улахан өйөбүлүнэн буолар. 2019-2022сс. “Агростартап” гранын 131 фермерскэй хаһаайыстыба ылбыта. Түөрт сыл иһигэр бу граҥҥа өрөспүүбүлүкэ үрдүнэн көрүллүбүт үп 368 мөлүйүөн буолла, онтон 297 мөлүйүөнэ федеральнай үп. 2022 сыллаахха 61,6 мөл көрүллүбүтэ. Быйыл Ил Дархан Айсен Николаев дьаһалынан өрөспүүбүлүкэ бырабыыталыстыбата нэһилиэккэ дьоҕус уонна орто урбаан сайдыытыгар, ол эбэтэр саҥа саҕалааччы фермердэргэ өрөспүүбүлүкэ бүддьүөтүттэн 58,6 мөл көрдө.
Елена Макаринская