Чурапчыга үөрэх үлэһиттэрин олунньутааҕы сүбэ мунньахтарын чэрчитинэн Болот Боотур аатынан Хатылы орто оскуолатыгар улуустааҕы «Үөрэх ыарахаттарын туоратыыга нейропсихология ньыматын туттуу. Дисграфия көрүҥнэрэ» сэминээр ыытылынна.
Дьаһалга алын кылаас учууталлара, уһуйаан иитээччилэрэ, оскуола психологтара, логопеттар кыттыыны ыллылар. Барыта 53 үлэһит сырытта.
Сэминээри үөрэх салалтатын социальнай психологическай өйөбүлүн сүрүн исписэлииһэ Жанна Монастырева иилээн-саҕалаан ыытта. Кини улууска нейропсихология хайысхатыгар үлэни сүрүннээччи буолар. Ол курдук, Жанна Петровна көҕүлээһининэн күһүн улууска доруобуйаларынан хааччахтаах оҕолорго аналлаах инклюзивнай үөрэхтээһиҥҥэ Ресурснай киин тэриллибитэ. Ол иһинэн Хатылы орто оскуолата, Дириҥнээҕи «Ыллык» уһуйаан уонна Чурапчытааҕы «Чуораанчык» уһуйаан киирэн, нейропсихология хайысхатыгар үлэлэрин саҕалаабыттара. Онуоха быйыл туох үлэни ыыппыттарын, ханнык ньыманы тутталларын туһунан сэминээр кыттыылаахтарыгар сырдаттылар. Ол курдук, Дириҥнээҕи «Ыллык» уһуйаан муусукаҕа салайааччыта Нюргуяна Петрова, медсестрата Анна Кузьмина, педагог-психолога Матрена Лазарева уонна Чурапчыттан «Чуораанчык» уһуйаан логопеда Марфа Корякина, психолога Анна Седалищева, ону сэргэ Хатылы оскуолатын алын кылаас учууталлара Степанида Павлова, Снежана Барашкова уонна оскуола педагог-психолога Светлана Григорьева тус бырайыактарын, бырагыраамаларын билиһиннэрдилэр.
Светлана Григорьева, педагог-психолог, тэрийээччи:
— Нейропсихологияҕа аналлаах сэминээр Хатылы оскуолатыгар иккис сылын ыытыллар. Былырыын үксэ алын сүһүөх оскуола учууталлара кыттыбыт буоллахтарына, быйыл уһуйаан иитиллээччилэрэ көхтөөхтүк кыттыбыттара үөрдэр. Биһиги оскуолабыт нейропсихология хайысхатынан таһаарыылаахтык үлэлээбитэ хаһыс да сыла буолла. Оҕо толкуйдуур дьоҕурун, болҕомтотун хамсаныы нөҥүө, холобур, араас нейро -оонньуулар, дьарыктар көмөлөрүнэн сайыннаран кэллибит. Алын кылаас учууталларын «Нейроалтыс» бырайыактара өрөспүүбүлүкэҕэ тиийэ биллэр. Онон бу уопуту дьаһал кыттыылаахтара сиһилии билэн-көрөн, тус үлэлэригэр туһаныахтара диэн эрэнэбин.
Анна Пестрякова, Бахсы орто оскуолатын психолога, эдэр исписэлиис:
— Нейропсихологияҕа аналлаах сэминээр Хатылы оскуолатыгар иккис сылын ыытыллар. Былырыын үчүгэй уоппускаҕа олорор буолан кыайан кыттыбатаҕым. Ол иһин быйыл анаан-минээн бэлэмнэнэн кэллим. Бу хайысханы психологтар үөрэтэллэрэ, үлэлэригэр тутталлара олус туһалаах. Онон эдэр исписэлиистэр маннык хабааннаах сэминээрдэргэ кыттан, атын үөрэх тэрилтэлэригэр үлэлиир ньымалары истэн, уопуттаах дьону кытта санаа атастаһан, саҥа билиилэри иҥэринэллэр, сана идиэйэлэр аһыллаллар.
Сэминээр түмүгүнэн, оҕо толкуйдуур дьоҕурун, өйүн-санаатын, этин-сиинин сайыннарар сыалтан нейропсихология ньыматын уһуйаантан саҕалаан оскуолаҕа диэри ситимнээхтик туһанан үлэни ыытар тоҕоостооҕун бигэргэттилэр.
Марфа Петрова.